خواطر منتصف الليل

 خواطر منتصف الليل

1- ميمكنش ليك تحكم بإحساس شي شخص إتجاهك واش يبغيك أو يهتم بيك أو يخاف عليك أو أو أو... لهذا قبل متفكر تكول علاش هذاك مكيعاملنيش مزيان كيما كنعاملو أنا تحكم فشعورك وعامل بالمثل متكولش حشومة أو لا خاصني نكون أنا ضريف واخا يكون الطرف الآخر ممزيانش معايا.. وياك تحن فشي حد محنش فيك.. محدك نتا مزيان معاهم وهوما كيطلعو لسما.. ديك سياسة ديال تكون كتعامل كلشي زوين تتخليك نتا هو الضحية لذلك قلب عليهم كيما قلبو عليك.. فاخر المطاف ايمشيو سواء عاملتيهوم زوين أو خايب يوا لاش نتا اتمرض راسك مع شي حاجة ما دايماش.. كن لنفسك كل شيء الكل عابر 🖤🌚..

2- علاقتي معاك اطوال على مبدأ الإحترام لي بيناتنا.. يعني نهار متبقاش تحترمني يا غنرجعك كي شي حد مكنعرفوش يا غنرجعك كي شي حد مكنعرفوش مكاينش خيار ثاني.. فلنتصرف على هاذ الأساس 🙂

3- يمكن ماشي من نصيبك أو ماشي الوقت المناسب باش يكون ليك.. أو يمكن لا كنتو بزوج كانت حياتكم اتولي أسوء.. ماشي ضروري انلقاو لي بغينا.. الأهم نبغيو لي لقينا 🖤🌠

4- مكنطيحوش عبثا.. كنطيحو باش نوضو أقوى.. كنطيحو باش نعرفو اليد لي غتمد لينا.. كنطيحو باش نعرفو معنى الصبر.. حتى حاجة مكتكون بدون مغزى.. ورا كل طيحة درس عميق.. تعلمتي داكشي لي بغينا.. متعلمتيش من طيحة أخرى غتعلم 🖤🌸..

5- خلينا نتفقوا أننا كاملين تتجينا واحد الفترة فحياتنا لي مكنبغيو نهدرو مع حتى واحد وفنفس الوقت باغيين لي يسول فينا ويلاحظ غيابنا وداك التغيير لي واقع لينا.. بلا ميحاسبنا علاش تبدلنا ويشد بيدينا حتى نتجاوزو ديك الفترة الصعيبة..

وللأسف حتى شي حد مكيفهم داك الوضع وكنضطرو نبعدو ما أمكن حتى تفوت ديك الفترة ونجمعو لينيرجي لي خاصانا ونرجعو كيما كنا.. 

ونخليو كل واحد على راحتو 🖤✔

6- مبقاش الخاطر باش نبداو صداقات وعلاقات جديدة 

مبقاش الخاطر باش نعاتبو شي حد ولا نلوموه علاش بعد علينا أو علاش بدلنا

مبقاش الخاطر نتسناو يد العون من شي حد أو كتف نتسندو عليه

رجع كلشي فحال فحال لي جا مرحبا ولي مشى ألف مرحبا

و لا شفتونا طافيين وبعدنا متكولوش متكبرين أو معقدين غير الحياة مرمداتنا بزاف حتى خسرنا طاقتنا ومبقاش لينا الجهد 🖤🍁..

راه حتى حنا مكرهناش..

7- أغلب خيبات الأمل لي تنطيحو فيها فعلاقاتنا مع الآخرين هي كنتسناو شي حوايج من الناس القراب لينا ومكناخدوهومش..

كنتسناو الاهتمام ومكيجيناش أو نتسناو شي حد يسول فينا للأسف مكيسولش.. كنتسناو شي حد يعطينا دليل بلي حنا مهمين عندو.. كنتسناو وكنتسناو وماكناخدوش.. لهذا باش تقضي على هاذ خيبات الأمل لي كطيح فيها كل مرة ظنيتي نفسك مهم عندهم.. متبقاش تسنى حتى شي حاجة من شي حد باش حتى لا ماخديتيهاش كاع ميبقى فيك الحال..

وتختصر عليك طريق طويلة 🖤🌸..

                                                🌷  مروى المتوكل 🌷